Om te veralgemeen, is gewoonlik nie die gewenste ding om te doen nie en kan baie bedrieglik wees. ‘n Rukkie gelede, het een of ander slim opname gewys, dat die Paraguane, van die gelukkigste mense op hierdie aarde is. Ek twyfel soms oor die motiewe van hierdie soort van ding, maar ek het nie opgelet waar die Brasiliane in hierdie lys val nie. Wat ek wel weet, is dat die Brasiliane, baie van hulle, meer spontaan is as baie van die Paraguane. Geen wetenskaplike opname nie, net persoonlike siening. Dit is nou na aanleiding van ons kontak, met beide volke en tale, moet bysê, die mense met wie ons kontak het, is op die platteland.
Baie spontaan en vriendelik, dit is nou die inwoners van die dorpie, Sete Quedas, Brasilië, waar ons gereeld kom. Nou dat ek daaraan dink, die meeste Brasiliane is so. Ons staan uit as buitelanders, dit hoor hulle as ons ons monde oopmaak. Duitsers (Alemao)? Nee. Nou waarvandaan is julle? As hulle hoor, groot verbasing, maar julle is dan wit. Dan besef mens die onkunde oor ons land van afkoms. Vra een eendag, is dit nou naby Egipte? Ek sou dink, die naam van SA moet tog redelik beskrywend van die ligging wees. Onkunde, die gebrek aan die studie van aardrykskunde? Dat hulle ´n gesels wil aanknoop, is gewis.
Vriende van die kinders daar, nooi ons elke keer om by hulle te gaan eet. Met die voorlaaste besoek, is dit toe sulke tyd. By Edinaldo en Lenir, lekker gekuier, informeel en baie groot gesels. Potgebraaide varkvleis, slaaie en natuurlik, knoffelbrood.
Opmerklik van hierdie wêreld, talle huisnywerhede, klein skaal. So bedryf Lenir, ´n broodbakkery. Elke dag ongeveer 80 tuisgebakte brode. Sy het ´n vaste kliëntebasis, wat haar brode verkies, want hulle weet die kwaliteit is reg. Elke oggend vroeg opstaan, 4 uur, sodat die warm brode reg is vir ontbyt. Twee oonde waarin sy bak. Een, houtverhit en die ander, gas. Edinaldo, in die konstruksiebedryf.
Die taal, die taal, die nuwe taal, is maar ´n probleem. Altyd gedink, dat as mens ´n kennis van Spaans het, sal Portugoose redelik maklik wees. Groot misverstand. Daar is woorde, wat dieselfde is, MAAR die uitspraak én die ander woorde, maak dit vir my moeilik om hulle te verstaan. Hulle verstaan, ongeveer, my Spaans, maar as hulle antwoord, sukkel ek en hulle sien gou die onkunde in my oë. Die feit, dat hulle op die grens van Paraguay is, beklemtoon die oorheersing van die Braziliane in die gebied. Net Portugees, aan die Paraguay kant ook. Ons werk daaraan, die Portugees, dit sal verbeter.
Dalk ‘n ander spraak, effe van ´n kultuurverskil, tog ook mense met dieselfde waardes as ons. ´n Ouma wat ook haar kleinkinders op haar selfoon het en hulle trots aan ons vertoon.Vriendelike mense, met wie mens kan vriende wees.
Wil van môre af, so bietjie die noordoostelike deel van Argentinië besoek. Dalk kom daar later ´n blog of wat, daaroor. Dít is nou, mits die reën ons toelaat, want hier is veral langs die Paraguayrivier, groot drama, met die waters wat uit die walle klim en grootskaalse oorstromings veroorsaak. Gelukkig, is ons hoog en word nie beinvloed nie.
Hasta la proxima
Lewies Mymer said:
‘n Wonderlike wêreld wat jy daar ontdek het, Danie.
coetzee2014 said:
Jy is so reg Louis. Net jammer ek sukkel nog so met die Portugees, maar dit is ´n baie moeilike taal, vir my.
HesterLeyNel said:
Wonderlik interessant hoe verskillend en tog, hoe eenders mense is. Julle is so gelukkig om so ‘n verskeidenheid van kulture te ervaar, sonder spanning en sonder vrees. (Tussen hakies – taal is mos nie ‘n probleem nie – ek kan lag en eet in enige taal).
coetzee2014 said:
Ja, daardie sonder spanning en sonder vrees, is baie om voor dankbaar te wees. Nie, dat mens seker hier ook heeltemal vry is van boosdoeners nie, maar hulle is nie aggresief en brutaal nie.Oor die taal is jy reg en as mens nog dan ook hande het om te help beduie, dan kom mens ver.
Tokeloshe said:
Daardie potbraai lyk heerlik !
Dit is interesant oor tale, hier dink mense ons eerste taal is Engels 😉
Ek is eenkeer deur ‘n Rus gekorigeer dat ek nie Afrikaans praat nie, maar Dutch 😉
Voorspoedige Nuwejaar.
coetzee2014 said:
Dit was baie lekker, dankie. Dan is julle uitspraak seker baie goed. Wonder nou wat is regte Dutch? Hier is nog ´n groep Mennoniete, wat plat Duits praat.Baie vreemd vir my. Ek is laat, maar voorspoed vir julle ook vir 2016. Dankie.
perdebytjie said:
Altyd so interessant om hier te lees!Stuur bietjie van daai reën diékant toe!Voorspoed vir die nuwe jaar,Danie.
coetzee2014 said:
Dankie. Wens tog so dat ek dit kon doen, die reën aanstuur. Ek is laat, dankie vir die wense en voorspoed ook vir julle.
scrapydo2.wordpress.com said:
Daardie- hoekom is jy wit het ek ook al beleef en dit nogal in Frankryk. Klink en lyk my lekker om daar te wees waar jy is. Geniet jou ou jaarsdag en voorspoed in nuwe jaar.
coetzee2014 said:
Ja, ons is bevoorreg om hier te wees met net die normale stres van die daaglikse lewe. Dankie vir die goeie wense, ek is laat, vir jou ook.
scrapydo2.wordpress.com said:
Dankie, ek weet die tyd vlieg alweer verder. Dis hier dieselfde, normale daaglikse gebeure maar niks om eers rerig bekommerd te wees nie.
ddupl3ss1s said:
Ek stem met almal saam , dit is heerlik om hier te lees oor mense se kulture wat so heeltemal verskil en die tale- ek dink ek sal swaarkry ,leer nie maklik n ander taal aan nie. O en amper vergeet ek.. mens raak so lekker honger daardie brode!! Mens.. Fees van ‘n jaar vir jou en familie Danie.
coetzee2014 said:
Dankie vir die goeie wense en vir julle ook. Ek is so agterstallig om te reageer op die kommentare. Ek sukkel baie met daardie Portugees, maar begin bietjie lig sien.