Ongelukkig het niemand, ´n skat ontdek nie. Daarvoor moet ons maar wag vir die Lotto, of soos dit hier bekend staan, die Bingo. Waar daar Duitsers is, sal jy wel Skat kry. ´n Kaartspel, waarsonder hulle nie kan klaarkom nie. Ons weet wat doen die Boere as daar meer as 2 of 3 is. ´n Politieke party of kerk sal gestig word. Meer as twee Duitsers, sal ´n pak kaarte uitruk en begin om Skat te speel. Hulle het my al probeer touwys maak, maar ek dink die meeste kaartspele is tydmors, ´n goeie boek of die internet, is ´n beter tydverdryf. Elkeen kan gelukkig self besluit oor sy voorkeure.

Die afgelope naweek het die 12e nasionale Skat kampioenskap hier in ons kolonie plaasgevind. Daar was buitelandse deelnemers van Argentinië, Brazilië en Chili. Die meeste deelnemers Duits of van Duitse oorsprong. 51 deelnemers. Feitlik elke Suid-Amerikaanse land het sy eie kampioenskap en dan is daar jaarliks ook ´n Suid-Amerikaanse kampioenskap met deelnemers van elke land. Spel is volgens die internasionale ISPA reëls gespeel. Om dinge bietjie interessanter te maak is daar met elke spel, ´n geldjie in gedrang. Nie veel nie, die bedrag per rondte is ongeveer gelykstaande aan R10.

Die kompetisie is ernstig, dog in goeie gees afgehandel. Soos met elke kaartspel, is daar behalwe geluk, tog ook vernuf aan verbonde. Goeie pryse was ook op die spel vir die wenners. Tipies Duits, alles goed georganiseer.

Vir die wat in die volgende weke dalk nie by die sokker sal uitkom nie, daar is ´n ander wêreldkampioenskap vanjaar in Suid-Afrika. Die Internasionale Skat kampioenskappe vind van die 8e tot die 18e Oktober in Kaapstad plaas.

Hasta la proxima.